“Dita më e bukur në jetën tonë. Erdhi në jetë djali ynë, Joeli”, ishte ky mesazhi që çifti i njohur, Ami Toska dhe Ermal Mamaqi, u dërguan miqve të tyre, si dhe fansave më 30 shtator, dita kur u bënë prindër për herë të parë. Aktori i njohur i humorit, që së fundi ka qenë më aktiv në muzikë, e ka ndarë me fansat këtë ngjarje të veçantë në jetën e tij, ndërkohë që Ami dhe djali i tyre Joel janë kthyer tashmë në shtëpi dhe gëzojnë shëndet të plotë. I pyetur nga gazeta “Panorama” për ndjesitë e të qenët baba dhe si po i përjeton këto ditë të para me mysafirin e vogël në shtëpi, Ermali pohon se: “Ndihem i lumtur si baba dhe për herë të parë po më shijon pagjumësia”. Ami u shkëput nga ekrani për të pasur një shtatzëni të kontrolluar, ndërkohë që gjatë kësaj periudhe u kujdes për përgatitjen e dhomës së bebes. Çifti i 31-vjeçarëve e mbajtën sekret emrin e djalit deri ditën e lindjes. Ata kanë vendosur ta quajnë djalin e tyre Joel (Zoti dhe Perëndia), pra me një emër biblik.
Ermal Mamaqi sapo ka nisur prindërimin e tij dhe nuk heziton aspak të bëjë edhe pak humor me veten.
“Kam kap rekord këtë javë. Qëndrimi më i gjatë në shtëpi. Eh... filloi prindërimi... Happy!”, shkroi ai në faqen e tij në Facebook ditën e sotme.
Me anë të kësaj fotoje ai ka treguar edhe dhomën e Joelit, e cila është dekoruar me të bardha dhe me një diell të madh sipër krevatit. Ndërkohë Ermalin e shohim me një arush në dorë dhe siç ai ka thënë vet, tashmë orët që ai do të kalojë në këtë dhomë do të jenë më të gjata.