E ç’më ka marrë malli rëndë
për një stan në korije
të shoh dhëntë kur vijnë në tëndë
të ulem dhe unë në hije

E rrugën le ta bëj në këmbë
të pij ujë rrëzë një lajthije
të kërrit mallin në hënë
të më lagë vesa që bie

E të vë kopenë në shtrungë
një nga një t’i shkoj tespije
të mbushen vedrat me shkumë
shkumë e deles me aq shije

E me barinjtë të marr një këngë
dhe curlës ëmbël t’i bie
të vesh gunën pa mëngë
të ngarkoj mushkën me zile

E ç’më ka marrë malli rëndë
rëndë ç’më ka marrë malli
për një stan e për një tëndë
për çikat që nxjerr stërralli


DËRGO