A B C D E F G H I J K L M N O P Q R S T U V W X Y Z #

Mbresa

Mbresa nga leximi i librit me titull : “ KËNGA POPULLORE QYTETARE E VLORËS “
Me autor :Pr.Dr. BARDHOSH GAÇE

Kur më bien libra artistik në dorë, sidomos të autorëve vlonjat, rrëmbimthi ulem për të lexuar. E para të marr kënaqsi estetike,e dyta kurioze, se çfarë ka dashur të thotë autori me krijesën etij dhe e treta të kuptoj se,ç’e ka ngacmuar atë shpirt që është përpëlitur për ngjizjen e kësaj krijese artistike. Por sot u ula të shkruaj për kënaqsinë e përciellë nga libri studimor, me titull : “ KËNGA POPULLORE QYTETARE E VLORËS “ me autor Pr. Dr.. Bardhosh Gaçe. Sinqerishtë u gëzova pa masë, kur ma dhuroi profesori librin. Leximi i tij, më bëri ta zgjeroj akoma më shumë hartën informative, ndaj origjinës së Këngës popullore vlonjate. Duke lexuar faqe pas faqeje, vura re, se autori i mirëinformuar nga ana historike na e sjellë shumë qartë,qysh nga zanafilla( 1872-1964 ) lindjen dhe lulëzimin e Këngës popullore qytetare vlonjate. Rresht pas rreshti mësoj,se ajo, ka derivuar nga këngët e dasmave të trevave që rrethojnë Vlorën, si zona e Kaninës, Mavrovës, Oshtimës, Panajasë, Zvërrnecit, Drashovicës, Himarës, Dukatit, Smokthinës e tjera…, të cilat me kalimin e viteve plotësuar me shoqërimin e veglave muzikore, por shkundur e pastruar edhe, nga dialektalizmat e arkaizmat e thella, jehonoi në zemër të Vlorës. Lagjet që kanë gëluar nga kënga qytetëse, janë ato që formojnë bërthamën e Vlorës sonë të bukur, si “ Karabashi ", vatra ku lindi dhe gjëmoi kënga me titull: “ Në Karabash bie qemania “, apo " Topanaja " me këngën “ Hidhi sytë në Topana “, apo “ Xhan, o moj Alije “ në lagjen “ Muradije “, si dhe lagjja “Vrenez “e Lirim. Dihet që gjallimi i jetës qytetare, si me të mira edhe me problematika e ka pasur të nevojshëm plotësimin e tyre edhe me kënaqsi estetike, të cilën e pëthithnin nëpërmjet këngëve,valleve dhe ligjërimeve të përpunuara. E, këto formonin atë që sot Pr.Dr. B. Gaçe na i sjell shumë qartë në këtë libër. Më ngacmuan memorjen e tri-katër dekadave më parë, kur trioja vlonjate - Meliha Doda, Reshat Osmani dhe Kostandin Thana, tundnin Vlorën me zërin e tyre melodioz. Nuk kish shfaqe në kinoteatrin “ Petro Marko “ që ata të mos performonin, me këngët : “ Nënë portokalle”, “ Në një arë, në një lëndinë “, “ Esmerkë lezet me kripë “, “ Dallandyshja në çardhak “, Çupë kush ta bleu fustan ”, “ Hajde moj kumblla vlonjate “, Këndojnë gjashtë bilbila “ e shumë të tjera.. Teksti, muzika dhe zërat e tyre melodioz, për momentin e kthenin Vlorën në qytet dasme. Nostalgji ndjeva edhe për këngëtaret më të vonshme që mbetën gur i çmuar në memorjen artistike vlonjate, si Kleopatra Skarço me këngën ‘ Dy faqet si portokalle, apo Milika Meminaj me këngën “ Syzezë e vetulla pë “. Nuk mund të lë pa e përmendur, këngëtaren zëbrilante nga Kanina, Ballkëze Hasimi ( Bakon ), e cila edhe, pse, për pak kohë shpërtheu dhe u dallua për zërin e rrallë voluminoz, ku here-herë e cilësonin simotër të artistes së kombit Vaçe Zela. I gjithë ky bagazh informativ që për mua është shumë i çmuar, por edhe kënaqsi estetike erdhi si rezultat i leximit të këtij libri. Në fund, nuk më mbetet gjë tjetër, veç të falenderoj thellësishtë nga zemra Pr.Dr. B. Gaçe për punën e shkëlqyer në drejtim të vlerave historike të artit vlonjat, gjithashtu t’i uroj suksese në punë të tjera studimore, pavarësishtë se mua m’u dha mundësia të lexoj botimin e tretë të tij,por kjo tregon se libri me titull : “ KËNGA POPULLORE QYTETARE E VLORËS “ është një material studimor që udhëton në kohë dhe mbetet vlerë e çmuar për ardhmërinë.

Natasha Limaj ( Fejzaj ) 12 / 07 / 2019

- tregim nga Natasha Limaj


Nuk ka akoma asnjë votë






Kjo faqe përdor cookies vetëm për reklama dhe statistika. Kjo faqe nuk mbledh, nuk përdor dhe nuk shpërndan të dhënat tuaja. Kompanitë e palëve të treta që përdorin cookies janë: Google, Taboola dhe MGID.
Më shumë info  
teksteshqip.com © 2007 - 2019