A B C D E F G H I J K L M N O P Q R S T U V W X Y Z #

Një Mbresë Nga Dita E Sotme

Më takoi në rrugë një shok sot dhe pa më dhënë dorën akoma e këndoi si një këngë këtë varg dhe më tha:
- Çfarë nderi i ke bërë fshatit të Pilurit, o njeri, me këtë varg në baladën tënde "Nëntë vjet e nëntë ditë."
Mbeta për një çast pezull, se mua as nuk më kish mbetur në kujtesë e as nuk më kish lënë ndonjë mbresë të veçantë ky varg i thjeshtë.
Po ai vazhdoi në të tijën: - Po pse, ore, nuk vure emrin e fshatit që të ka bërë kokën, Turanin tënd?
Nja dy tri sekonda nuk dita se si t'i përgjigjesha. Mendova me vete: "... ec e merre vesh se ku qëndron tjetri, kur lexon një këngë tënden, aty ku nuk ta pret fiqiri..."
- Të të them të drejtën nuk më ka shkuar ndonjëherë ndër mend kjo gjë, - i thashë. - Po edhe ty ku të ka vajtur mendja?...
"Shok me malin,"... eeej, po pse çfarë nderi më të madh mund t'i bëhet një fshati? -nguli këmbë... -Shok me malin! Sa më pëlqen!... Po të paktën,... a të ka falënderuar ndonjë piluriot? -pyeti prapë.
-Më ka falënderuar Timo Mërkuri... Dhe e dyta... Piluri është aq i bukur, sa e meriton ta zgjedhësh si të më të parin e Shqipërisë... Po mbase meritën për këtë e ka edhe Lefter Çipa, - i thashë unë, bardi i madh himariot i këngës labe, që e bëri të njohur si yllin më vezullues të polifonisë shqiptare.
Hajde e merre vesh se si e ka peshuar truri atë çast, kur e zgjodha për baladën njëmijë vjeçare,... se mos ka qenë në dorën time...

- tregim nga Petrit Ruka


Nuk ka akoma asnjë votë






Kjo faqe përdor cookies vetëm për reklama dhe statistika. Kjo faqe nuk mbledh, nuk përdor dhe nuk shpërndan të dhënat tuaja. Kompanitë e palëve të treta që përdorin cookies janë: Google, Taboola dhe MGID.
Më shumë info  
teksteshqip.com © 2007 - 2019