Një prej reperëve më të suksesshëm shqiptar, Rebeli i njohur si Unikkatili , do të lansojë shumë shpejt këngën e tij të re, e cila pritet të jetë prej hiteve më të mëdha në karrierën e tij. Telegrafi ekskluzivisht mund të zbulojë nga burimet e afërta me reperin legjendar shqiptar se ai tashmë është duke punuar në këngë të reja. "Viktori (Unikkatili) i është kthyer studios. Ai ka pushuar një kohë pas koncertit të mbajtur në Prishtinë. Tani e ka marrë shumë seriozisht punën për përfundimin e albumit, por para kësaj ka kohë, pasi që pritet të vijë një këngë e re nga Rebeli". "Kënga do të jetë e jashtëzakonshme. Një prej më të mirave në gjithë karrierën e tij. Do të jetë dicka e ngjashme si kënga "Krejt Hajvan", por më shumë nuk mund të zbuloj rreth kësaj", ka deklaruar ky burim për Telegrafin. Mbetet të shihet nëse menaxhmenti i Unikkatilit do të konfirmojë lajmin apo edhe vet reperi do ta demantojë një gjë të tillë. Viktor Paloka është një prej artistëve më të mëdhenj në historinë e muzikës shqiptare, ndërsa vlen të përmendet koncerti i mbajtur në korrik të këtij viti, kur në Stadiumin e Qytetit të Prishtinës ai mblodhi hiç më pak se 25 mijë persona dhe ku shpalosi flamurin kombëtar në skenë për nderë të 100 vjetorit të shtetësisë së Shqipërisë etnike.