Pas Hysni Klinakut, Visar Pejës dhe Danit, edhe këngëtari nga Gjakova, Artan Bakija, ka vendosur që të mos paraqitet në festivalin e këngës shqipe që po mbahet në televizionin Klan.

Vendimi i Artan Bakijës është i njëjtë me këngëtarët tjerë të lartpërmendur. Performanca e këngëtarit serb, Zdravko Çoliq, ishte e papranueshme, aq sa edhe Artan Bakija me një njoftim për media ka konfirmuar largimin nga festivali i këngës në Klan.

Letra e Bakisë
"Po ju njoftoj sot publikisht për një vendim timin të para disa ditëve për tërheqjen nga festivali "Kënga Ime" në Klan. Arsyet e tërheqjes janë personale dhe morale të lidhura me pjesëmarrjen e këngëtarit serb Zdravkok Çoliq në këtë festival".

"Ky festival ishte i menduar si festival i muzikës shqipe dhe moralisht mendoj se është e pandershme që Zdravko Çoliq të jetë pjesë e një festivali të tillë. Ne jemi muzikantë dhe nuk merremi me politikë. Muzika dhe politika duhet të jenë të ndara nga njëra-tjetra. Zdravko Çoliq ishte këngëtar politik gjatë luftës së Kosovës. Këndimi itij në këtë festival vetëm sa na kujtoi qëndrimet e në këngët e tij politike".
"Duke qenë se jam nga Gjakova, që ka vuajtur shumë nga lufta, mospajtimet e mia serioze me prezencën e tij në këtë festival ishin aq të mëdha moralisht dhe profesionalisht, sa që tërheqja ime nga ky festival ishte e menjëhershme", theksoi këngëtari Bakija në komunikatën dërguar për media.
Zdravko Çoliq performoi kohë më parë në skenën e festivalit "Kënga Ime" në Klan, duke ngritur një valë të madhe kritikash dhe polemimkash për performancën e tij në këtë festival, e me ç'rast ka nxitur edhe tërheqjen e shumë këngëtarëve tjerë shqiptar nga ky manifestim muzikor.