Këngëtarja super energjike e skenës shqiptare Aurela Gaçe, mbrëmjen e djeshme është martuar ashtu siç e kishte parathënë muaj më parë. Një nuse tërësisht ndryshe, madje për këtë ajo bëri edhe flokët tullace, duke bërë shaka me to. “Dua të jem nusja e parë tullace në Shqipëri”, - u shpreh Aurela pas këtij ndryshimi në pamjen e saj. Dhe nga foto që kemi mundur të sigurojmë, teksa Aurela e entuziazmuar bëhej gati për këtë ditë të bukur, shohim se ia ka dalë të jetë nusja shqiptare me flokët më të shkurtër.



Ceremonia e dasmës ka qenë tërësisht diskrete për paparacët dhe mediat, duke dashur kështu të paktën një ditë në vit privatësi. 300 kanë qenë të ftuarit e Aurelës dhe Skerdit në këtë ditë të veçantë dhe mes tyre shumë kolegë e miq të afërt të çiftit. Artiola Toska, Eli Fara, Ardit Gjebrea, Vera Grabocka, Alda Bida, Petri Bozo, Vëllezërit Korçarë, Aleksandër Gjoka, Elton Deda kanë qenë disa nga emrat e njohur të artistëve të ftuar në dasmën e këngëtares, një prej më të mirave të skenës sonë . Madje shumë prej tyre edhe kanë kënduar në këtë gëzim të çiftit, i cili është bekuar mbrëmjen e djeshme nga vogëlushja e tyre Grace, e cila tashmë është një vjeçe.



Madje edhe ftesa që Aurela ka dërguar për ditën e dasmës së saj mban “firmën” ku binte në sy mbishkrimi “ Skandal! Mami Aurela dhe babi Skerdi, nga punët e shumta kanë harruar të martohen”. Por, ashtu siç befason përherë edhe me këtë dasmë Aurela ka befasuar. Mos kujtoni se ajo do të jetë tani gruaja tradicionale e martuar, pasi as nuk i shkon nëpërmend një gjë e tillë. Madje kjo dasmë nuk do të pasojë celebrimin e zakonshëm që çiftet bëjnë kur martohen, duke i qëndruar kështu besnike “dashurisë së lirë pa një copë letër”. Fustani i Aurelës ndryshe nga ç’pritej e tregon atë shumë klas dhe këpucët e kësaj dite kanë qenë tërësisht të veçanta, pasi ishin të punuara me dorë.

Suprizat e kësaj mbrëmjeje ishin të shumta, shumë prej të cilave nuk i kemi marrë vesh, veç faktit që Aurela nuk mund të mos i këndonte vetes një këngë në këtë ditë kaq të bukur për të.



Dikur ishte menaxheri i saj, ndërsa sot ai është mbështetja më e madhe e këngëtares së njohur. Sot ata janë jo vetëm partnerë në art, por gëzojnë bashkë një nga dhuratat më të bukura për çdo çift: vogëlushen e bukur me emrin Grace. Pas shkëputjes së gjatë nga vendi, në kohën e qëndrimit në Amerikë, të gjithë aludonin mbi jetën private të saj deri në momentin që çdo gjë u bë publike. Aurela u rikthye fuqishëm në Shqipëri dhe lajmet mbi jetën private të saj pushtuan mediat rozë. Tani ata kanë hapur bashkë edhe një lokal të ri me muzikë live në kryeqytet dhe Skerdi jo vetëm është mbështetja kryesore e Gaçes, por është edhe personi që i ka dhuruar asaj mjaft lumturi.