>
BIOSHQIP

Greta Koçi: U Tërhoqa Nga Gara Për Arsye Personale

17-11-2015
Në faqen e saj zyrtare në Facebook, Greta Koçi ka dhënë të gjitha sqarimet e nevojshme, duke justifikuar faktin për tërheqjen e saj nga gara për Forumin Rinor të PD. Një ditë pasi Greta Koçi u tërhoq nga kjo garë, edhe dy kandidatë të tjerë kanë vendosur të tërhiqen. Bëhet fjalë për Lisandër Hoxha dhe Enri Ceno.

Nuk dihen arsyet e tërheqjes, por nga PD thonë se kjo ka ndodhur për shkak të rezultateve të tyre të dobëta. Nga 6 kandidatë që e nisën këtë garë, tashmë në lojë kanë mbetur vetëm 3 kandidatë, Ervin Salianji, Belind Këlliçi dhe Oriela Nebijaj.
Në rrjetin social, Greta Koçi ka sqaruar përse vendosi të tërhiqej nga gara. "Dorëhiqem nga gara për kreun e FRPD për arsye personale dhe mbështes kandidatin, Belind Këlliçi.

Të dashur miq, mbështetës, të rinj dhe të reja demokrate. Po ju drejtohem sot me shpresën se sinqeriteti dhe përkushtimi im në FRPD gjatë periudhës 4 vjeçare që kam mbajtur postin e Nënkryetares, nuk ju ka zhgënjyer.

Ju keni qenë forca ime e vërtetë, pasi me mbështetjen tuaj më keni motivuar gjithmonë në rrugëtimin tim politik. Kam qenë gjithmonë e bindur se nëse në çdo vendim timin, në funksionin e Nënkryetares së FRPD, do të mbaja parasysh energjinë, idetë dhe vullnetin tuaj për të luftuar me mish e me shpirt për lirinë dhe demokracinë, sëbashku do të bënim të pamundurën, të mundur.
Sëbashku kemi qenë në krye të aksioneve opozitare për më shumë drejtësi, dinjitet dhe mirëqënie. I kemi kërkuar të drejtat tona kudo dhe çdo herë që kjo qeveri ka nëpërkëmbur vlerat demokratike dhe të drejtat themelore të njeriut.

Sinqerisht, më lejoni t’ju shpreh falenderimet e mia më të thella për të gjithë besimin që patët tek unë, me bindjen se sëbashku kemi ndarë çaste të mrekullueshme në një kohë kur demokracia rrezikohej dhe vazhdon ende të rrezikohet nga ata që e urrejnë progresin dhe vizionin e një Shqipërie me vlera europiane.

Dua gjithashtu të falenderoj liderin historik të Partisë Demokratike, Z. Sali Berisha, për besimin që pati tek unë kur më caktoi në këtë post mjaft të rëndësishëm në FRPD, si edhe Kryetarin aktual të demokratëve, Z. Lulzim Basha, për bashkëpunimin e mrekullueshëm që kam patur gjatë kësaj kohe në kauzën tonë të përbashkët si kërkesa primare e Partisë Demokratike, që është dekriminalizimi i politikës dhe rikthimi i një parlamentarizmi të denjë për shqiptarët.

Për arsye personale, me keqardhje të thellë më duhet t’ju bëj me dije dorëheqjen time si kandidate në garën zgjedhore për Kryetarin e ri të FRPD. Megjithatë, pavarësisht këtij vendimi, kontributi dhe puna ime e ngushtë me FRPD dhe Partinë Demokratike do të vazhdojë të jetë njësoj si më parë për sfidat që na presin në kuadër të aksioneve opozitare.

Jam e bindur se të gjithë kandidatët që janë në garë mbartin vlera të padiskutueshme dhe kanë dhënë kontributin e tyre të veçantë për Partinë Demokratike, por duke i njohur mirë platformat dhe alternativat që ata japin për organizimin dhe mirëmenaxhimin e të rinjve dhe të rejave demokrate, unë personalisht do të mbështes Belind Këlliçin për postin e Kryetarit të ri të FRPD.

Ftoj të gjithë mbështetësit dhe dashamirësit e mi, si edhe të gjithë të rinjtë dhe të rejat demokrate që duan të shohin një Forum Rinor që të jetë promotore e vlerave të vërteta dhe avokate e të drejtave tona, të votojnë Belind Këlliçin. Ju falenderoj edhe njëherë për mbështetjen tuaj dhe shihemi në aksionet e ardhshme opozitare".
(Indeksonline)

Greta Koçi: U Tërhoqa Nga Gara Për Arsye Personale